भक्तपुर – नेपाल मजदुर किसान पार्टी (नेमकिपा)का अध्यक्ष नारायणमान बिजुक्छेले देश र जनताको सेवा गर्ने देशभक्त विद्यार्थी उत्पादन गर्नु हरेक शैक्षिक प्रतिष्ठानको दायित्व भएको बताउनुभएको छ ।
शुक्रबार वागीश्वरी कलेज, वागीश्वरी कलेज अफ म्यानेजमेन्ट र वागीश्वरी माध्यमिक विद्यालयको उद्घाटन गर्दै नेता विजुक्छेले राष्ट्र र राष्ट्रियताको रक्षा गर्ने तथा राष्ट्रप्रेम जागृत हुने पाठ्यक्रम निर्माण गर्नुपर्नेमा जोड दिनुभयो ।
बिजुक्छेले भन्नुभयो, “देश र जनताको सेवा गर्ने भावना हाम्रा विद्यार्थीमा विकास गर्नुपर्छ ।” उहाँले बढ्दो वैदेशिक हस्तक्षेपविरुद्ध प्रतिरोधको क्षमता आजका विद्यार्थीमा जगाउनुपर्नेमा जोड दिनुभयो । कलेज व्यवस्थापन समिति अध्यक्ष एवं भक्तपुर नगरपालिकाका प्रमुख सुनिल प्रजापतिले वागीश्वरी कलेजले कम शुल्कमा गुणस्तरीय शिक्षा प्रदान गर्दै आएको दाबी गर्नुभयो । नेमकिपा केन्द्रीय सदस्य एवं वागमती प्रदेशसभा सदस्य सुरेन्द्रराज गोसाईं, भक्तपुर नगरपालिका–९ का वडाध्यक्ष एवं वागीश्वरी मावि व्यवस्थापन समितिका अध्यक्ष रवीन्द्र ज्याख्व, कलेजका प्राचार्य धनकुमार श्रेष्ठले मन्तव्य व्यक्त गर्नुभएको थियो ।
