काठमाडौँ ९ साउन । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एमालेका नेता माधव कुमार नेपालबिच भेटवार्ता भएको छ । आज शनिबार नेता नेपाललाई भेट्न प्रचण्ड नेपाल निवास कोटेश्वर पुगेका हुन् ।
भेटका क्रममा प्रचण्डले नेपालले केपी शर्मा ओली प्रति गरेको भाषणका लागि धन्यवाद दिएका थिए । व्यंग्यात्मक तरिकाले गरिएको भाषणमा ओलीलाई महाराज भनेका आफुले धन्यवाद दिएको पनि अध्यक्ष प्रचण्डले जनाएका छन् ।
नेपाललाई भेटी पेरिसडाँडा पुगेका प्रचण्डले गठवन्धन भत्किन नदिने प्रयास भइरहेको बताएका छन् । आफुले बचाउन खोजे पनि गठवन्धन भत्काउने प्रयास भइरहेको बताएका अध्यक्ष प्रचण्डले भने, ‘गठबन्धन टुटाउने प्रयास भयो । बचाउने प्रयास गर्यौं । अहिले पनि भत्काउने प्रयास भैरहेको छ । एमसीसीमा भिडाएर झगडा गराउन खोजिदैछ।’
नेपाल कम्युनिस्ट पार्टीका संस्थापक नेता नरबहादुर कर्माचार्यको ८औं स्मृति दिवसका अवसरमा आज शनिबार पेरिसडाँडामा आयोजित एक कार्यक्रममा अध्यक्ष यस्तो प्रतिक्रिया दिएका हुन् । संविधानको रक्षा गरेपनि अझै चुनौती रहेकोले बुद्धिमत्तताका साथ सामना गर्नुपर्ने पनि प्रचण्डले बताएका छन् ।
