चितवन, १५ असोज ः जिल्ला कारागारमा कैदीबन्दीको चाप बढेसँगै क्षमतामा वृद्धि गरिएको छ । कार्यालयले दुई सय ८० जनाको क्षमता रहेको कैदीबन्दी गृहलाई क्षमता बढाएर पाँच सय पाँच पु¥याएको हो ।
कार्यालयका प्रमुख कमलप्रसाद आचार्यका अनुसार कारागार कार्यालयले विगत एक महिनाअघि कारागारको क्षमता वृद्धि गरेको हो । उहाँले भन्नुभयो, “कैदीबन्दी राख्न बनाइएको ‘घ’ ब्लक सञ्चालनमा आएको भए पनि यसको क्षमतालाई जोडिएको थिएन, अहिले औपचारिक रुपमा जोड्ने काम गरिएको छ ।”
‘क’ र ‘ख’ ब्लकमा हुँदै आएको क्षमतालाई नै यस कारागारको क्षमता भन्दै आइएकामा अहिले ‘घ’ ब्लकलाई समेत जोडेर क्षमता वृद्धि गरिएको उहाँले बताउनुभयो । उहाँले भन्नुभयो, “ब्लक सञ्चालनमा आएको लामो समय भए पनि अहिले आधिकारिक रुपमा क्षमता वृद्धि गरेको कारागार व्यवस्थापन विभागलाई जानकारी गराएका छौँ ।” कैदीबन्दीको चापअनुसार क्षमता वृद्धि गरिएको उहाँले जानकारी दिनुभयो ।
क्षमता वृद्धि भएसँगै २५ जनाको क्षमता रहेको महिला बन्दीगृहमा ३० र दुई सय ५५ जनाको क्षमता रहेको पुरुष बन्दीगृहमा चार सय ७५ पु¥याइएको छ । महिला गृहमा पाँचजनाको क्षमता थप गरिएको छ भने पुरुष गृहमा दुई सयदेखि दुई सय २५ जना अट्नसक्ने गरी थप गरिएको हो ।
कार्यालयका अनुसार नवलपरासीको बर्दघाट–सुस्ता पूर्वमा कारागार नहुँदा कैदीबन्दीको सङ्ख्या थपिँदै जाँदा क्षमता वृद्धि गर्नुपरेको हो । त्यहाँबाट महिनामा ३० जना हाराहारी कैदीबन्दी सजायका लागि यहाँ आउने गरेको आचार्यले जानकारी दिनुभयो ।
उहाँका अनुसार अहिले कारागार कार्यालय चितवनमा छ बालबालिकासहित सात सय ४८ कैदीबन्दी रहेका छन् । त्यसमध्ये ४४ महिला, छ सय ९८ पुरुष र छ बालबालिका कैदीबन्दी रहेका छन् । साथै नयाँ कारगारका लागि जग्गा खोजी भइरहेको छ ।
