बैतडी, ९ भदौ : यहाँका किसानले उत्पादन गरेको तरकारीले बजार नपाउँदा समस्या भएको छ । मेहनत गरेर उत्पादन गरेको तरकारीले बजार नपाउँदा लाखौँको क्षतिसमेत पुगेको छ । दशरथचन्द नगरपालिका–१ गुरुखोलाका किसानले लगाएको बन्दाले बजार नपाउँदा बारीमै कुहिएको स्थानीय मानबहादुर टेरले बताउनुभयो । बारीमा लगाएको बन्दा कुहिन थालेपछि चिन्ता बढेको छ । उहाँले भन्नुभयो, “किसानको बन्दा बारीमै कुहिँदा लाखौँको क्षति भएको छ, बजारमा बिक्री नहुँदा बारीमै कुहिएर नष्ट भएको छ ।”
बारीमै बन्दा कुहिन थालेपछि व्यावसायिकरुपमा तरकारीखेतीमा लागेका किसान समस्यामा परेका छन् । यस्तै जिल्लाको सिगास र सुर्नया गाउँपालिकामा उत्पादित आलुले पनि बजार पाएको छैन । उत्पादित आलुले बजारमा खासै मूल्य पाउन नसकेको सिगास–१ का किसान रोशन साउदले बताउनुभयो ।
उहाँले भन्नुभयो, “बजार भाउ निकै कम दिइरहेका छन्, रु ७० प्रतिकिलो बीउ किनेर लगाएका थियौँ, उत्पादन पनि राम्रो भयो, तर बजार भाउ भने त्यसको आधा मात्रै छ ।” वडा नं १ मा ५० देखि ६० रोपनीमा करिब तीन सय क्विन्टल आलु उत्पादन भएको भए पनि बजारमा मूल्य पाइएको छैन । भण्डारणका लागि शितभण्डार नभएकाले पनि समस्या भएको छ ।
शितभण्डार नहुँदा सुर्नया–७ का दानबहादुर मडैले ५० क्विन्टल बढी आलु घरमा राख्नुभएको छ । उहाँले भन्नुभयो, “आलुले उपयुक्त बजार मूल्य पाएको छैन, भण्डारण गर्न शितभण्डार नहुँदा घरमै राखेका आलु बिग्रिन थालेका छन् ।” बैतडीमा एक वर्षमा १३ हजार नौ सय मेट्रिकटन तरकारी उत्पादन हुने गरेको कृषि ज्ञान केन्द्रले जनाएको छ ।
