काठमाडौँ, २६ साउन-भौतिक पूर्वाधार तथा यातायातमन्त्री प्रकाश ज्वालाले राष्ट्रिय गौरवका आयोजना, रूपान्तरणकारी योजना र अन्य महत्त्वपूर्ण योजनाहरूमा युद्धस्तरमा काम गर्न निर्देशन दिनुभएको छ ।
भौतिक पूर्वाधार तथा यातायात मन्त्रालयले आज आयोजना गरेको प्रगति समीक्षा कार्यक्रममा उहाँले वर्षाैं पहिले निर्माणका काम थालिएका योजना पटकपटक अवधि थप्दा पनि नसकिँदा नागरिकमा गलत सन्देश जाने बताउनुभयो । उहाँले यो वा त्यो बहानामा निर्माणकार्य ढिला नगर्न मातहतका निकायलाई निर्देशन दिनुभएको हो । उहाँले भन्नुभयो, “अन्धाधुन्ध काम गरेर मात्र हुँदैन, शक्तिशाली सिंहजस्तै दुई कदम अगाडि बढ्ने र एक पटक समीक्षा गर्ने नीति लिएर निर्माणकार्यमा लाग्न जरुरी छ ।”
मातहतका कर्मचारीलाई निर्देशन दिँदै मन्त्री ज्वालाले प्रत्येक चौमासिकमा योजनाको अनिवार्य समीक्षा गर्ने चलन बसाल्नुपर्नेमा जोड दिनुभयो । त्यसले आयोजनामा आएका समस्याको पहिचान र समाधानको उपाय दिने उहाँको भनाइ छ ।
मन्त्री ज्वालाले केही आयोजनाको कामप्रति असन्तुष्टि पनि जनाउनुभएको छ । नेपाली सेनाले सञ्चालन गरिरहेको काठमाडौँ–तराई दु्रतमार्गको काम सोचेअनुसार नभएको उहाँको भनाइ छ । उहाँले भन्नुभयो, “नेपाली सेनाबाट सडक निर्माणका क्षेत्रमा प्रशंसनीय काम भइरहेका छन् तर द्रुत गतिमा हुन सकेन ।”
राष्ट्रिय गौरवका अधिकांश सडक आयोजनाको भौतिक प्रगति गत आर्थिक वर्षभन्दा बढी भएको छ । पूर्णरूपमा सन्तोषजनक नभए पनि अघिल्लो आवभन्दा यस आवको प्रगति राम्रो रहेको सडक विभागका महानिर्देशक सुशीलबाबु ढकालले बताउनुभयो ।
