मुम्बई । एसएस राजामौलीले निर्देशन गरेको भारतीय चर्चित चलचित्र ‘आरआरआर’ को सिक्वेल बन्ने भएको छ । दक्षिण भारतीय अभिनेताद्वय रामचरण र जुनियर एनटीआर अभिनीत यो चलचित्रले बक्स अफिसमा विश्वभर १२ सय ७५ करोडको कलेक्सन गर्न सफल भएको छ । सौर्य दैनिकमा खबर छ । पछिल्लो समय यस चलचित्रको सिक्वेलको छायांकन छिट्टै गर्ने तयारीमा निर्माण पक्ष जुटिरहेको भारतीय सञ्चारमाध्यमले जनाएका छन् । उनीहरुका अनुसार यस पटक राजामौलीले यो चलचित्र निर्देशन नगर्ने सम्भावना छ । चलचित्र ‘आरआरआर’ को सिक्वेलको चर्चा एउटा ट्विटबाट सुरु भएको छ, जसमा भनिएको छ, ‘आरआरआर फिल्मको सिक्वेल पक्का भएको छ ।
हामी रामचरण र जूनियर एनटीआरसँग आरआरआरको सिक्वेल बनाउने योजनामा छौं । यो हलिउड मापदण्डमा हुनेछ । यो फिल्म या त एसएस राजामौलीले निर्देशन गर्नेछन् वा उनको सुपरिवेक्षणमा कसैको हातमा हुनेछ ।’ चलचित्रको कथामा केवी विजयेन्द्र प्रसाद काम गरिरहेको बताइएको छ । राजामौली हाल महेश बाबुको चलचित्र ‘जंगल एडभेन्चर’ मा व्यस्त छन् । यो चलचित्रको काम सकाएपछि उनले आफ्नो ड्रिम प्रोजेक्ट ‘महाभारत’ को छायांकन गर्ने जनाइएको छ । यसबारेमा निर्माण पक्षले अहिलेसम्म कुनै जानकारी नदिएको भारतीय सञ्चार माध्यमले उल्लेख गरेका छन् ।
