इंग्लिस प्रिमियर लिग फुटबलमा न्युकासल युनाईटेडले फराकिलो गोल अन्तरको जित निकालेको छ ।आइतबार राति भएको खेलमा न्युकासलले टोटेनहमलाई ६-१ गोल अन्तरले पराजित गरेको हो । खेलको दोस्रो मिनेटमा जाकोब मुर्फेले गोल गर्दै न्युकासललाई सुरुआती अग्रता दिलाएका थिए । छैटौं मिनेटमा जोइलिनटनले गोल गर्दा न्युकासल २-० ले अघि रह्यो ।
नवौं मिनेटमा जाकोबले व्यक्तिगत दोस्रो गोल गर्दा न्युकासल ३-० ले अघि रह्यो ।१९ औं मिनेटमा एलेक्जान्डर इसाकले गोल गर्दै न्युकासललाई ४-० को अग्रता दिलाए ।खेलको २१ औं मिनेटमा इसाकले व्यक्तिगत दोस्रो गोल गर्दै न्युकासललाई ५-० को अग्रता दिलाए ।
खेलको ४९ औं मिनेटमा ह्यारी केनले गोल गर्दै टोटेनहमलाई ५-१ को स्थितिमा ल्याए ।त्यसपछि खेलको ६७ औं मिनेटमा कलुम विल्सनले गोल गर्दै न्युकासललाई ६-१ को जित दिलाए ।जितसँगै न्युकासलले ३१ खेलमा ५९ अंक जोडेको छ । न्युकासल तेस्रो स्थानमा उक्लिएको छ ।
