एसियाली क्रिकेट काउन्सिल एसीसी प्रिमियर कपको पहिलो खेलमा भोली नेपालले मलेसियासँग प्रतिष्पर्धा गर्दैछ । टियु मैदान कीर्तिपुरमा हुने खेल बिहान साढे नौबाट सुरु हुनेछ । नेपाल मलेसियाबीचमा आईसीसी तथा एसीसीका प्रतियोगिताहरुमा धेरै पटक भेट भएको छ ।नेपाल र मलेसियाबीचको पछिल्लो पाँच भेटमा नेपाल अपराजित रहेको छ ।
नेपाल र मलेसियाबीचको पछिल्लो भेट २०१८ को एसीया कप छनोट प्रतियोगितामा भएको थियो । मलेसियामा नै आयोजना भएको सो प्रतियोगितामा नेपाल १९ रनले विजयी भएको थियो । मलेसियामा नै आयोजना भएको विश्वकप क्रिकेट लिग डिभिजन थ्रीमा समेत नेपाल विजयी भएको थियो । २०१४ को अक्टोबर महिनामा आयोजना भएको खेलमा नेपालले डीएल मेथडमा ३६ रनको जित हात पारेको थियो ।
एसीसी प्रिमियर लिगमा २०१४ नेपाल र मलेसियाबीच खेल भएको थियो । मलेसियामा नै भएको सो खेलमा नेपाल ५ विकेटले विजयी भएको थियो । २०१२ को एसीसी ट्रफि एलिटको सेमिफाईनलमा नेपाल र मलेसियाबीच खेल भएको थियो । यस खेलमा नेपाल २१ रनले विजयी भएको थियो ।
