काठमाडौं । ‘छक्कापञ्जा ४’ले दोस्रो सातामा पनि आक्रामक कमाइ गरिरहेको बेला ‘फूलबारी’लाई पनि यसको फाइदा भएको छ । छक्कापञ्जा ४ को ‘ओभरफ्लो’को फाइदा फूलबारीलाई भएको हो ।
व्यापारमा ‘ड्रप’ भइसकेको फूलबारीको कमाइ ‘छक्कापञ्जा ४’ रिलिज भएपछि पुनः उकालो लागेको हो । विपिन कार्की स्टारर फिल्मले २४ दिनसम्म घरेलु बक्स अफिसमा साढे चार करोड रुपैयाँ हाराहारीमा कमाइ गरेको छ ।
फूलबारी’लाई सकारात्मक समीक्षा र बलियो ‘वर्ड अफ माउथ’ले साथ दिएका कारण पहिलो साता नै लगानी उठाइसकेको थियो । छक्कापञ्जा ४ हाउसफुल चल्दा मल्टिप्लेक्सले यसलाई कम्तीमा ५ देखि १० शोसम्म दिंदै आइरहेका छन् ।
‘कबड्डी’ फेम्ड रामबाबु गुरुङ निर्देशित फिल्म ‘फूलबारी’मा विपिनले ६० वर्षे अवकाशप्राप्त सरकारी शिक्षकको भूमिका निर्वाह गरेका छन् । अभिभावक र सन्तानबीचको सम्बन्धको कथा पेस गर्ने फिल्मलाई पारिवारिक दर्शकले रुचाए । फिल्ममा प्रियंका कार्काीको पनि मुख्य भुमिका रहेको छ ।
