एएफसी यू २० महिला एसियन कप छनोटको पहिलो खेलमा नेपालले प्यालेस्टाइन माथि सानदार जित निकालेको छ । फैजल अल हुसेनी अन्तराष्ट्रिय रंगशालामा बुधबार भएको खेलमा नेपालले आयोजक प्यालेस्टाइनलाई ६-० गोल अन्तरले हराएको हो ।नेपालको सानदार जितमा दिपा शाहीले ह्याट्रिक गोल गरिन् ।
गरिमा राईको नाममा दुई गोल रह्यो । नेपालले एक गोल आत्मघाती उपहार पायो ।खेलको २१ औं मिनेटमा दिपाले गोल गर्दै नेपाललाई सुरुआती अग्रता दिलाएकी थिइन् । जितसँगै नेपालले पहिलो खेलमै ३ अंक जोडेको छ । छनोटको समूह बी मा नेपाल, प्यालेस्टाइन र नर्दन मारियाना आइल्याण्ड रहेको छ ।
अब दोस्रो खेलमा नेपालले नर्दन मारियानासँग सोमबार खेल्नेछ ।छनोटबाट समूह विजेताले दोस्रो चरणमा स्थान बनाउने छन् । दोस्रो चरण जुन ३ देखि ११ सम्म हुनेछ । जसबाट उत्कृष्ट ४ टोलीले उज्वेकिस्तानमा हुने यू २० महिला एसियन कप खेल्नेछ ।
