काठमाडौं – बलिउड फिल्म ‘तु झूठी मैं मक्कर’को नेपाल रिलिज रोकिदा ‘छक्कापञ्जा ४’लाई फाइदा भएको छ । बुधबारदेखि प्रदर्शनको तयारीमा रहेको बलिउड फिल्म ‘तु झूठी मैं मक्कर’को नेपाल रिलिज रोकिएको हो । भारतीय सेन्सर बोर्डको प्रमाणपत्र नआउँदा प्रदर्शन रोकिएकोपछि जसको फाइदा प्रत्यक्ष रुपमै ‘छक्कापञ्जा ४’लाई पुगेको हो ।
बुधबारदेखि रिलिज हुने भन्दै हलहरुले मंगलबार नै शो तालिका प्रकाशित गरेका थिए । तर सेन्सर पास नहुँदा हलहरुले प्रकाशित शो पनि हटाएका छन् । भारतमा भने रणवीर कपुर र श्रद्धा कपुर स्टारर फिल्म बुधबार नै रिलिज भइसकेको छ ।
फिल्म रिलिज रोकिएपछि स्वभाविक रुपमा ‘छक्कापञ्जा ४’ले राम्रै व्यापार गर्नेछ । नारी दिवसको बिदाको अवसरमा फिल्मले आक्रामक कमाइ गर्ने प्रक्षेपण गरिएको छ । यता छड्के २ पनि हलबाट बाहिरिइसकेको छ । फिल्मले जम्मा ३० लाखको व्यापार गरेको बताइएको छ ।
