काठमाडौं, २५ असार-कास्की, पोखरा महानगरपालिका-१७ छोरेपाटन बरको बोटस्थित ड्युटीमा खटिएको प्रहरीलाई नगद ५ सय रुपैयाँ दिई आर्थिक प्रलोभनमा पार्न खोज्ने स्याङ्जा फेदिखोला गाउँपालिका-२ घर भएका ३५ वर्षीय मुक्तिराम पौडेललाई बिहीबार बिहान प्रहरीले पक्राउ गरेको छ ।
पोखराबाट बुटवलतर्फ जाँदै गरेको लु.२ ख २९३ नम्बरको बसलाई उक्त स्थानमा खटिएको प्रहरीले जाँच गर्ने क्रममा बसका सह-चालक पौडेलले उक्त नगद दिन खोजेको तथा प्रहरीमाथि अभद्र व्यवहार समेत गरेपछि उनलाई उक्त नगद सहित पक्राउ गरेको हो । उनी उपर सार्वजनिक हित स्वास्थ्य सुरक्षा सुविधा र नैतिकता बिरुद्धको कसूर अन्तरगत अभद्र व्यवहार सम्बन्धी मुद्दामा जिल्ला अदालत कास्कीबाट ५ दिन म्याद थप गरी अनुसन्धान प्रकृया अगाडि बढाइएको जिल्ला प्रहरी कार्यालय कास्कीले जनाएको छ ।
सिन्धुली, कमलामाई नगरपालिका-९ भिमानस्थित ड्युटीमा खटिएको प्रहरीलाई नगद ५ सय रुपैयाँ दिई आर्थिक प्रलोभनमा पार्न खोज्ने दुधौली नगरपालिका-११ बस्ने २५ वर्षीय सरगम घिमिरेलाई गएराति प्रहरीले पक्राउ गरेको छ ।
भिमानबाट दुधौलीतर्फ जाँदै गरेको प्रदेश २-०२-००२ प ३६०७ नम्बरको मोटरसाइकललाई ईलाका प्रहरी कार्यालय भिमानबाट खटिएको प्रहरीले जाँच गर्ने क्रममा मोटरसाइकलमा सवार उनको साथबाट १ खिल्ली चुरोटमा लागूऔषध गाँजा भरी राखेको अवस्थामा फेला पारी नियन्त्रणमा लिने क्रममा उनले प्रहरीलाई उक्त नगद दिन खोजे पश्चात उनलाई उक्त नगद तथा मोटरसाइकल सहित प्रहरीले पक्राउ गरेको हो ।यस सम्बन्धमा प्रहरीले थप अनुसन्धान गरिरहेको छ ।
