काठमाडौं – चलचित्र विकास बोर्डले दुबईमा गर्न लागेको फिल्म फेस्टिभलमा ‘महापुरुष’ सहभागी नहुने भएको छ । निर्माण कम्पनी षट्कोण आर्ट्सले सोमबार विज्ञप्ति जारी गर्दै आफूहरुलाई नसोधिकन र अनाधिकृत ढंगले फिल्म देखाउन लागिएको भन्दै प्रदर्शन गर्न अनुमति नदिने निर्णय गरेको जनाएको छ ।
आर्ट्सले जारी गरेको विज्ञप्तिमा भनिएको छ ‘महापुरुष राखेर पोस्टर बनाइएकोमा हाम्रो आपत्ति छ ।विवादित र अनावश्यक खर्चको कार्यक्रममा हाम्रो साथ, सहयोग र सहमति छैन । हामीले फिल्म नदिने निर्णय गरेका छौं ।’ सूर्य कर्पोरेसनसँग मिलेर ३० लाख रुपैयाँ खर्चमा गर्न लागिएको फेस्टिभलप्रति पनि ‘महापुरुष’ निर्माण कम्पनीले प्रश्न उठाएको छ ।
नेपालमै फिल्म चलाउन मुस्किल भैरहेको बेला दुबईमा फेस्टिभल गर्छु भन्नुले अर्थ नराख्ने कार्यकारी निर्माता रविन्द्रसिंह बानियाँले बताए । बोर्डले सूर्य कर्पोरेसनसँग मिलेर फागुन १ गतेदेखि ३ सम्म युएईको दुबईमा आयोजना फेस्टिभल आयोजना गर्न लागेको छ ।
उक्त फेस्टिभलमा कबड्डी ४ र ऐना झ्यालको पुतलीजस्ता फिल्म देखाउने पनि बोर्डको तयारी छ ।फेस्टिभलमा सहभागि हुन ३५ जनाको टोली दुबई जाने तयारीमा रहेको जनाइएको छ ।
