गायिका त्रिशला गुरुङले आज ठमेलमा लाइभ कन्सर्ट गर्ने भएकी छन्। युट्युबमा कभर गीत गाएर युवापुस्तामाझ चर्चित बनेकी गायिका गुरुङले ठमेलस्थित टर्टल लाउन्ज एन्ड क्लबमा राति ९ बजेबाट आफ्नो ब्यान्डसहित लाइभ प्रस्तुति दिने तय भएको हो । अघिल्लो साताको शुक्रबार यहीँनेर गायिका तृष्णा गुरुङले ब्यान्डसहित एकल प्रस्तुति दिएकी थिइन् ।
टर्टल क्लबका सञ्चालक आयुष ठकुरीका अनुसार त्रिशलाले आज आफ्ना ओरिजिनल गीतहरु मायालु, काठमाडौं शहर, यो मन आदिसहित कभर गाउँदा चर्चित भएका गीतहरु गाएर दर्शकलाई झुमाउने कार्यक्रम छ । चिकित्सकसमेत रहेकी गुरुङ डाक्टर गायिकाका रुपमा समेत परिचित छिन् ।
विगत पाँच वर्षदेखि सञ्चालित टर्टल क्लब गत क्रिसमस इभमा सविन राईको लाइभ कन्सर्टसहित नयाँ स्वरुपबाट सञ्चालनमा छ। केही सातासम्म अब हरेक शुक्रबार टर्टलमा चर्चित कलाकारहरूको लाइभ प्रस्तुति तय भएको सञ्चालक ठकुरीले बताए।
