काठमाडौं । निर्देशक सौरभ चौधरीको ड्रिम प्रोजेक्ट ‘द अनब्रेकेबल स् अगस्त्य’ मा अभिनेता सौगात मल्ल अनुबन्धित भएका छन् । माघेसंक्रान्तिको अवसर पारेर आइतबार एक पोस्टर जारी गर्दै निर्माण युनिटले चलचित्रमा सौगातको अभिनय रहने जनाएको छ । ‘मिस्टर भर्सटायल’ को ट्याग दिइएको सौगात पोस्टरमा एक कुकुरका साथमा स्टाइलिस लुक्समा फिचर छन् । चलचित्रमा उनी अगस्त्यको भूमिकामा रहने छन् ।
चलचित्रका लागि अन्य कलाकार पनि चाँडै अनुबन्धित गरिने निर्देशक चौधरीले सुनाए । उनी स्वयंको लेखन रहेको चलचित्रलाई प्रकाश मल्ल र अनिष तामाङले निर्माण गर्ने छन् । राजेश श्रेष्ठको छायांकन रहने यो चलचित्र डार्क हर्स इन्टरटेन्मेन्टको ब्यानरमा निर्माण हुन लागेको हो । चलचित्रको नेपालमा काठमाडौं र नवलपरासी, भारतमा गोरखपुर र बनारसमा छायांकन हुनेछ ।सौर्य दैनिकमा खबर छ ।
चलचित्रमा नेपालीसँगै भारतका केही चलेका कलाकारको पनि अभिनय रहने जनाइएको छ । निर्देशकसहितको टिम चाँडै भारतीय कलाकारसँग कागजी सम्झौता गर्न मुम्बई जाने तयारीमा छ । दुई शृंखलामा निर्माण हुन लागेको चलचित्रको दुवै पार्टको स्क्रिप्ट तयार भइसकेको छ । आगामी बैशाखबाट छायांकन सुरु गर्ने तयारी गरिएको चलचित्र एक्सन प्रधान रहने निर्देशक चौधरीले जानकारी दिए ।
उनी ‘अगस्त्य’ लाई उत्कृष्ट बनाउन आफूले विगत दुई वर्षपछि अथक मिहिनेत गरिरहेको बताउँछन् । यो चलचित्रलाई उनले आफ्नो ‘डु एन्ड डाई’ को रुपमा लिएका छन् । त्यस्तै, निर्माता प्रकाश मल्लले कथावस्तु सुनेपछि चलचित्र निर्माणका लागि सहर्ष राजी भएको बताउँदै चलचित्र स्तरीय बन्ने विश्वास व्यक्त गरे । हिन्दु धर्मका सप्तऋषि मध्येका अगस्त्य ऋषिको नामबाट चलचित्रको शीर्षक जुराइएको हो ।
