काठमाडौं । लोकप्रिय गायक पशुपति शर्मालाई आज दुर्घटनामा परेको यती एयरलाइन्सको जहाज सपना जस्तै लागेको छ ।
आज दुर्घटना भएकै जहाजमा पोखरा जाने तयारीमा रहेका गायक पशुपति शर्मा दुर्घटनामा पर्नबाट जोगिएपछि उनले विमान दुर्घटनाको खबर आउँदा नमज्जा लागेको, रुन मन लागेको बताएका छन् । उनले आँफु भाग्यले बाँचेको बताउँदै भने भोलि पनि हिँडिरहनुपर्छ । भोली कसले देखेको छ र ? शर्मा पोखराबाट अहिले स्याङजातर्फ लागेका छन् ।
त्यसपछि उनी बागलुङको कार्यक्रममा पुग्ने तयारीमा छन् उनी । देशको बिभिन्न ठाउँमा मेला महोत्सव चलिरहेकोले अहिले गायक पशुपतिजस्तै गायक हेमन्त शर्मा पनि आइतबार बागलुगंमा आयोजित एक कार्यक्रममा प्रस्तुती दिन जाने क्रममा झण्डै सोही जहाजमा नपरेको सुनाउँछन् ।
आइतबार दुर्घटनाग्रस्त विमान भन्दा अघिल्लो जहाजको टिकट आयोजकले काटिदिएका कारण आँफु जोगिएको उनले बताए । हेमन्तले सामाजिक सञ्जालमा एक पोष्ट गर्दै लेखेका छन् ‘आज म काठमाडौंबाट पोखरा उडेको करिब १ घन्टापछि काठमाडौबाट पोखरा उडेको जहाज नराम्ररी दुर्घटना ग्रष्ट भएको छ । सँगै प्रतिक्षामा रहन हुने देखादेख भएका कति यात्रा, पक्कै पर्नुभयो ।
साह्रै दुःख लाग्यो’ उनले पोष्टमा अगाडि लेखेका छन्– ‘सम्पूर्ण मृतकहरुप्रति हार्दिक श्रद्धान्जली व्यक्त गर्दछु ।’ उनले जिन्दगीको केही भर नभएको समेत पाष्टमा उल्लेख गरेका छन् । उनले बिहान आफ्नो पोष्ट हेरेर आफुप्रति चासो दिनेलाई समेत धन्यवाद भनेका छन् ।
गायक शर्माका अनुसार उनी पोखरा पुगेको करिब एक घण्टापछि यती एयरलाइन्सको ९एन–एएनसी विमान गन्तव्यमा नपुग्दै दुर्घटनामा परेको हो । हवाई उडानका लागि नेपाली आकाश सुरक्षित छैन भन्ने आरोप फेरि एक पटक पुष्टि हुन पुगेको छ । आइतबार बिहान १०ः ३० बजे काठमाडौंदेखि पोखराका लागि ६८ यात्रु बोकेर उडेको यती एयरलाइन्सको ९एन–एएनसी विमान गन्तव्यमा नपुग्दै दुर्घटनामा परेको छ । विमानमा ४ जना चालक दलका सदस्य र ६८ जना यात्रु सवार थिए । दुर्घटनामा भएको मानवीय क्षतिकोे यकिन विवरण आइसकेको छैन ।
