अष्ट्रेलिया फिफा विश्वकप फुटबलको अन्तिम १६ मा प्रवेश गर्न सफल भएको छ । कतारमा जारी फिफा विश्वकप २०२२ अन्तर्गत समू डी को अन्तिम खेलमा डेनमार्कलाई एक शुन्यले स्तब्ध पार्दै अष्ट्रेलियाले १६ वर्षपछि बिश्वकपको अन्तिम १६ मा स्थान बनाउन सफल भएको हो ।
यो जित संगै समूह डी मा उपविजेता बन्दै नकआउट चरणमा अष्ट्रेलियाले स्थान पक्का बनाएको हो । अल जानोब स्टेडियममा भएको खेलमा अष्ट्रेलियाको लागि म्याथ्यु लेकीले खेलको ६०औं मिनेटमा रिले म्याग्रेको पासमा गरेको गोल नै जितका लागि निर्णायक बनेको थियो ।
यसअघि अष्ट्रेलिया सन् २००६ मा जर्मनीमा भएको विश्वकपमा अन्तिम १६ मा पुगेको थियो । जारी विश्वकपमा समूह डी मा अष्ट्रेलिया र साविक विजेता फ्रान्सले समान ६ अंक जोडेपनि गोलअन्तरमा फ्रान्स अघि रहेर समूह विजेता बनेको हो ।
