आउने मान्छे आफ्नै बाटोबाट आउने, जाने पनि आफ्नै बाटो लाग्ने सामान्यतया फौजको चलन यस्तै छ । तर, यसचोटि नेपाली सेनामा यो चलन तोडेर आउने र जाने टोलीबीच अलग–अलग तयारी, अभ्यास र दौडधुप चलिरहेको छ ।
जाने जम्मा एक जना प्रधानसेनापति हुन् र आउने पनि एकजना त्यही दर्जाका कमाण्डर । आगामी प्रधानसेनापति मानिने प्रभुराम शर्माको सैनिक सचिव हुने गरी धादिङको बैरेनीस्थित ६ नम्बर बाहिनीबाट सुनिल श्रेष्ठ जंगी अड्डा तानिएका छन् भने सैनिक सहायकका रुपमा २ बाहिनीपति धनकुटाबाट आएका चोकबहादुर ढकालले बाँकी व्यवस्थापन गर्दैछन् ।
यी दुबै २८ बेसिकका अफिसर हुन् । सुनिल, दरबार हत्याकाण्डपछि छाउनीबाट राजारानीको शव आर्यघाट लैजाँदा स्वयम्भू भगवान पाउछेउ भीडको ढुंगामुढाबाट हेल्मेट लगाइदिई हवाई फायर गरेर तत्कालीन प्रधानमन्त्री गिरिजाप्रसाद कोइरालालाई जोगाउने एडिसी हुन् ।
त्यतिबेला आक्रोशित युवाहरूले प्रधानमन्त्रीको गाडी तोडफोड गरेका थिए । त्रिशूली र बुटवलमा सैनिकलाई तालिम गराउने प्रमुख सेनानी सुनिल सुवेदीलाई पनि भावी सेनापतिको कोर टिममा ल्याइएको छ । हाल सैनिक प्रवक्ताको जिम्मेवारीमा रहेका सन्तोषबल्लभ पौडेल पनि प्रभुरामको टिमभित्रै रहनेछन् ।
२६ बेसिकका बाबुराम श्रेष्ठ, सुरेश बानियाँहरुलाई कहाँ राख्ने टुंगो छैन । दिवंगत लेफ्टिनेन्ट जर्नेल् कुलबहादुर खड्काका साँढुभाइ सुरेशचाहिँ नेशनल डिफेन्स कोर्ष गरेर पनि बढुवाबाट वञ्चित हुँदै आएका पीडित हुन् । यो समाचार जनआस्था साप्ताहिकमा छ ।
अहिलेका सैनिक सचिव पदमबहादुर सिंहले अवकाश पाउन लागेका छन् । ३ बाहिनी विजयपुर, पोखराबाट कुमारबाबु थापालाई सैनिक संगठनमा तानिएको छ भने त्यहाँ हालका सैनिक सहायक प्रेम पुन जाँदै छन् । गोर्खाली कुमारबाबु बेलायतबाट केही समयअघि फर्किएका थिए ।
सेनाभित्र अहिले जानेहरुले आउनेलाई बरबुझारथको धमाधम छ । भित्री समूहमा काम गर्नेहरुलाई पुरानो समूहका अधिकृतले पत्रहरु लेख्ने तरिकादेखि सेनाको बढी सरोकार रहने परराष्ट्र, रक्षा र अर्थ मन्त्रालयतिर समन्वय गर्ने शैलीबारे सिकाउने काम भइरहेको छ ।
