डडेलधुरा । नेकपा एमालेले आँफुमाथि भइरहेको चौतर्फी घेराबन्दीलाई परास्त गर्न भन्दै डडेलधुरामा प्रतिनिधि सभा सदस्य चुनावमा स्वतन्त्र उम्मेदवार विक्रमबहादुर शाहीलाई समर्थन गर्ने भएको छ ।
यसअघि नेपाली कांग्रेस वीपीका उम्मेदवार कर्ण मल्लसँग चुनावी तालमेल गर्ने जनाएको एमालेले अन्तिम समयमा आएर तालमेल नगर्ने निष्कर्षमा पुगेको थियो । तर अहिले आएर एमालेले आफ्नै पूर्व जिल्ला नेता शाहीलाई समर्थन गर्ने निर्णय गरेको हो । शाही स्वतन्त्र उम्मेदवार हुन् ।
एमाले डडेलधुराका अध्यक्ष प्रेमबहादुर बोहोरा तथा सचिव शिवराम ताम्राकारले संयुक्त विज्ञप्ति निकाल्दै एमालेमाथि भइरहेको चौतर्फी घेराबन्दीलाई परास्त गर्न शाहीलाई समर्थन गरिएको उल्लेख छ ।
डडेलधुरा यस्तो निर्वाचन क्षेत्र हो जहाँ प्रधानमन्त्री तथा नेपाली कांग्रेसका सभापति शेरबहादुर देउवा चुनाव लड्दै छन् । देउवाले पटक पटक निर्वाचन जितेको जिल्लामा यसपटक स्वतन्त्रबाट सागर ढकाल, कर्णसिंह रावल , लालबहादुर कठायत उम्मेदवार छन् । त्यसत्े देउवाले नेपाल कांग्रेस वीपीका मल्ल, जनता समाजवादी पार्टी नेपालका श्याम सिनाल, राष्ट्रिय प्रजातन्त्र पार्टीका गोविन्द खडायतको पनि यसपटक सामना गर्नुपर्नेछ ।
