काठमाडौं ।
चलचित्रको व्यापारबारे गलत रिपोर्टिङ गरेको भन्दै सुदर्शन थापाले एक पत्रकारलाई कानको जाली फुटाउने धम्की दिएका छन् । नौलोन्यूज डटकम नाम अनलाइनमा प्रकाशित समाचारलाई लिएर उनले पत्रकार सुजन श्रेष्ठलाई फोन गरेर निर्देशन सुदर्शन थापाले यस्तो धम्की दिएका हुन् ।
चलचित्रको व्यापारका विषयमा भ्रामक समाचार सम्प्रेषण गरेको आरोप थापाको छ ।थापा निर्देशित चलचित्र ‘सम्हालिन्छ कहिले मन’ हेर्न दर्शक नआएको भन्दै सो अनलाइनमा एउटा तस्बिरसहित समाचार प्रकाशित भएपछि आपत्ती जनाउँदै थापाले आफ्नी श्रीमतीको मोबाइलबाट फोन गरेर गाली गलौज गरेको बताइएको छ।
यता पत्रकार श्रेष्ठले भने आफू स्वयम् हलमा गएर देखेको दृष्यअनुसार समाचार बनाएको बताएका छन् ।सुजनले ‘टिकट फ्रि हुँदा पनि हल सुनसान’ भन्ने शीर्षकमा समाचार लेखेका थिए । यो समाचारपछि सोमबार साँझ ४ बजेतिर सुदर्शन थापाले आफूलाई फोन गरेर धम्क्याएको सुजनको आरोप छ । अहिले देशभर चलचित्र ‘सम्हालिन्छ कहिले मन’ देशभर प्रदर्शन भइरहेको छ ।
