काठमाडौं २ भदौ । नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टीभित्र अहिले ब्यक्तिवादी र स्वार्थी गुटहरु देखा पर्न थालेको बताएका छन् ।
बिहिबार नेता रामबृक्ष यादवको स्मृति दिवसमा पार्टी केन्द्रीय कार्यालय पेरिसडाँडामा आयोजित कार्यक्रमलाई सम्वोधन गर्दै अध्यक्ष माओवादी पार्टी पहिलेको जस्तो क्रान्तिकारी पार्टी नरहेको भन्दै यस्तो बताएका हुन् । तर माओवादी विगतको भन्दा विग्रेपनि देशको सवैभन्दा राम्रो पार्टी भने माओवादी नै रहेको प्रचण्डले दावी गरे ।
‘हामी अलिकति बिग्रिएका छौं। हिजोको जस्ता क्रान्तिकारी छैनौं। ब्यक्तिवादी, आत्मकेन्द्रित र स्वार्थी भएका छौं, हामीले प्रतिस्पर्धा गरेर त्याग गर्नेतिर भन्दा पनि आफैंतिर कसरी बलियो बन्ने भन्नेतिर लागेका छौं,’ प्रचण्डले भने।
ब्यक्तिबादी, आत्मकेन्द्रीत र स्वार्थी भएपनि आफुहरु सामुहिक भावनाद्दारा ओतप्रोत भएर जाने बताउँदै प्रचण्डले अघि भने , ‘विचारमा, दस्तावेजमा अहिले पनि हामी क्रान्तिकारी नै छौं, तर दैनान्दिनको ब्यवहार र हाम्रो गराई र भनाईमा अन्तर आईसकेको छ । यसको हल गर्न सकिएन भने हामीले क्रान्तिकारी हुनुपर्छ भन्ने कुराको औचित्य समाप्त हुन्छ । त्यसैले रामबृक्षको बलिदानलाई सम्झेर सवैले आफैभित्र फर्केर आत्मसमिक्षा गर्नुपर्छ ।’
