काठमाडौं ३१ साउन । बञ्चरेडाँडाका स्थानीय वासिन्दाको अवरोधका बाबजुत पनि काठमाडौंबाट फोहोर बोकेर गएको गाडी बञ्चरेडाँडा ल्याण्डफिल साइटमा पुगेको छ ।
काठमाडौं महानगरपालिकाका प्रवक्ता नवीन मानन्धरले दिएको जानकारी अनुसार बाक्लो प्रहरीको सुरक्षा घेराका साथ फोहोर बोकेको ट्रक बञ्चरेडाँडा ल्याण्डफिल साइट पुर्याइएको छ ।
आज मंगलबार पनि नुवाकोटको सिसडोल र आलेटारमा स्थानीय वासिन्दाले फोहोर बोकेका गाडीमा अवरोध गर्नुका साथै प्रहरीमाथि ढुंगा प्रहार गरेका थिए ।
काठमाडौं प्रहरी परिसरका प्रवक्ता दिनेश मैनालीले दिएको जानकारी अनुसार आन्दोलनकारीलाई तितरवितर गर्न प्रहरीले रबरको गोली र अश्रुग्यास प्रहार गरेको थियो ।
ल्याण्डफिल साइटमा अहिले फोहोर खसाल्दा पनि बाटोमा प्रहरी र स्थानीय आन्दोलनकारीबीच झडप भइरहेको छ । अहिले पनि स्थानीयले ढुंगा हानिरहेकोले प्रहरीले बल प्रयोग गरिरहेको अवस्था छ ।
