भक्तपुर ७ असार । अवैध लागूऔषध सहित एक जनालाई प्रहरीले पक्राउ गरेको छ । पक्राउ पर्नेमा सुनसरी दुहवी नगरपालिका ६ ठेगाना भएका ४३ वर्षीय गोपाल पोखरेल रहेका छन् ।
उनलाई मध्यपुर थिमी नगरपालिका १ लोकन्थलीस्थित सडकबाट बा.९८ प ७५९९ नम्बरको स्कुटरमा ५ सय मिलिग्राम अवैध लागूऔषध खैरो हेरोईन सहित प्रहरीले शुक्रबार दिउँसो पक्राउ गरेको हो ।
लागूऔषध नियन्त्रण व्यूरो कोटेश्वरबाट खटिएको प्रहरीले जाँच गर्ने क्रममा अवैध लागु औषध फेला परेपछि पोखरेललाई नियन्त्रणमा लिई उनी बस्ने कोठा खनतलासी गर्दा एक सय एमएलको डाईलेक्स डिसि ७ बोतल, ६० ग्राम लागूऔषध गाँजा र १ थान डिजिटल तराजु बरामद भएको प्रहरीले जनाएको छ ।
पक्राउ परेका पोखरेलमाथि लागूऔषध मुद्दामा म्याद थप गरी अनुसन्धान भइरहेको लागूऔषध नियन्त्रण व्यूरोले जनाएको छ ।
