काठमाडौं १७ साउन । नेकपा माओवादी केन्द्रका सांसद अमनलाल मोदीले नेत्रविक्रम चन्द विप्लव नेतृत्वको नेकपालाई गरिएको पक्राउ पुर्जी जारी प्रति आपत्ती जनाएका छन् ।
मंगलबार प्रतिनिधिसभाको विशेष समयमा बोल्दै सांसद मोदीले सरकारसँगको सहमतिका आधारमा जेलमा रहेका सो समूहका नेता कार्यकर्तालाई रिहा गर्नुको साटो उल्टै पक्राउ पुर्जी गरिएको भन्दै आपत्ती जनाएका हुन् ।
‘नेकपा विप्लव समूहसँग सरकारले तीन बुँदे सहमति गरेको छ। त्यसको कार्यान्वयनको सट्टा अहिले पनि धरपडक, वारेन्ट जारी हुन त यो अदालतको कुरा हो। तर सरकारसँग वार्ता गरिसकेपछि सरकारले पहलकदमी लिनुपर्छ। जेलमा रहेका बन्दी रिहाइ गरिनुपर्छ,’ उनले भने।
संविधान जारी गर्नुअघि भएको थारु आन्दोलनका क्रममा पक्राउ परेर जेलमा रहेका र मुद्दा लगाइएकाहरूबारे पटकपटक सरकारको ध्यानाकर्षण गराउँदा पनि सुनुवाई नभएको बताएका उनले भने , ‘कयौं मान्छेलाई झुठो मुद्दा लगाइएको छ।’
राज्यको पुनसंरचना गर्दा पहिचानसहितको संघीयताको लागि आन्दोलन गर्दा थारूहरू जेल जीवन बिताइरहेको बताए ।
