काठमाडौं । लामो समयदेखि काठमाडौं महानगरपालिकामा थुप्रिएको फोहोर आजबाट उठ्ने भएको छ । महानगरपालिकाले सूचना नै जारी गरेर आज बिहान ६ बजेदेखि फोहोर संकलन सुरु गर्ने जनाएको छ ।
महानगरपालिकाद्धारा जारी गरिएको सूचनामा फोहोरमैला ढुवानीको लागि आउने सवारी साधनसम्म पुऱ्याइ सुरक्षित रुपमा घरभित्र राखिएको फोहोरमैला संकलन गर्ने कार्यमा सहयोग पुऱ्याइदिन अनुरोध गरिएको छ ।
सूचनामा कुहिने र नकुहिने फोहोर छुटाउन समेत आग्रह गरिएको छ । पछिल्ला दिनमा बञ्चरेडाँडासम्म जाने सडक निर्माणको काम भइरहेकाले महानगरपालिकाले फोहोर संकलन र ढुवानी रोकीएको जनाएको थियो ।
महानगरपालिकाका मेयर बालेन शाहले एक हप्तासम्म फोहोर घरभित्रै राख्न आग्रह गरेका थिए ।
