काठमाडौं ७ साउन । नेकपा एमालेका अध्यक्ष केपी शर्मा ओलीले पुष्पलालले देखाएकै मार्गमा आफुहरु हिडेको बताएका छन् ।
शनिबार नेपाल कम्युनिष्ट पार्टीका संस्थापक महासचिव पुष्पलाल श्रेष्ठको ४४ औँ स्मृति दिवसमा आयोजित कार्यक्रमलाई सम्बोधन गर्दै अध्यक्ष ओलीले यस्तो प्रतिक्रिया दिएका हुन् ।
अहिले देशको परिवर्तनकारी र बलियो शक्ति पुष्पलालले नै स्थापना गरेको पार्टी नेकपा एमाले भएको दावी गरेका उनले देशको सबैभन्दा सचेत, संगठित, सबल, विस्तृत, परिवर्तनकारी शक्ति नै एमाले भएको जिकिर समेत गरे ।
‘म एमालेका अध्यक्ष भएको हैसियतमा भन्न चाहन्छु, पुष्पलाल र अरु अग्रजहरूले देखाएको बाटोबाट अलिकति पनि विचलित हुनेछैन ‘ । नेपाली समाजलाई समृद्ध र सुखी नेपाली बनाएर छोड्ने संकल्प फेरि पनि आफुले दोहोर्याउने बताए ।
