मुम्बई:
बलिउड अभिनेता रणवीर कपूर र अभिनेत्री आलिया भट्ट अभिनीत चलचित्र ‘ब्रह्मास्त्र’ को ‘केसरिया’ गीत सार्वजनिक भएको छ । आइतबार सार्वजनिक गरिएको गीतमा गायक अरिजीत सिंहको स्वर रहेको छ । गीतमा अमिताभ भट्टाचार्यको शब्द र प्रितमको संगीत छ । सार्वजनिक गीतको भिडियोमा अभिनेता रणवीर र अभिनेत्री आलियाको अभिनय छ ।
आयान मुखर्जीले निर्देशन गरेको चलचित्रमा अभिनेता रणवीर र अभिनेत्री आलियासँगै अभिनेता अमिताभ बच्चन, अक्किनेनी नागार्जुन र मोनी रोयको प्रमुख भूमिका छ । रोमान्स, एक्सन र ड्रामासहित चलचित्र शिवाकोे कहानीमा आधारित छ । शिवाको भूमिका रणवीरले निभाएका छन् । शिवा इशासँग प्रेम गर्छन् । इशाको भूमिकामा आलिया छन् । शिवासँग एक सुपर–पावर छ, ‘अग्निको शक्ति’ । अमिताभ ब्रह्मा र नागार्जुन भगवान विष्णुको भूमिकामा देखिएका छन् । मोनी भने नकारात्मक भूमिकामा देखिएकी छन् । जो ब्रह्मास्त्र कब्जा गर्न चाहन्छिन् । भारतीय सञ्चार माध्यमका अनुसार चलचित्र तीन सय करोड भारूमा निर्माण गरिएको हो । योसँगै ब्रह्मास्त्र भारतमा अहिलेसम्मकै सबभन्दा धेरै लगानीमा बन्ने चलचित्र बनेको छ ।
’ब्रह्मास्त्र’ ले प्रदर्शन हुनुभन्दा अगाडि नै कीर्तिमान राखेको छ । यो चलचित्र वाल्ट डिज्नी स्टुडियो पिक्चर्सको ग्लोबल रिलिज क्यालेन्डरमा समेत परेको छ । यस सूचीमा पहिलो पटक भारतीय चलचित्र परेको हो । ग्लोबल रिलिज क्यालेन्डरमा परेसँगै चलचित्र आगामी ९ सेप्टेम्बरमा विश्वभर एकसाथ प्रदर्शन हुने निर्माण पक्षले जनाएको छ । फक्स स्टार स्टुडियो र धर्मा प्रोडक्सनले निर्माण गरेको यो चलचित्र हिन्दी, तेलुगु, तमिल, कन्नड र मलयालम गरी पाँच भाषामा प्रदर्शन हुनेछ । फक्स स्टार स्टुडियोमा वाल्ट डिज्नी स्टुडियो मोसन पिक्चर्सको सहकार्य रहेको छ ।
