काठमाडौं १४ असार । राष्ट्रिय सभा सदस्य तथा नेकपा राष्ट्रिय एकता अभियान पार्टीका अध्यक्ष बामदेव गौतमले नेपालमा कम्युनिष्ट आन्दोलन नै धराशायी बन्दै गएको बताएका छन् ।
मंगलबार काठमाडौंमा नेकपा राष्ट्रिय एकता अभियान पार्टीको घोषणा गर्दै गर्दा गौतमले आफूले जग हालेको र आन्दोलन सुरु गरेको कम्युनिष्ट पार्टी नै धरासायी बनेकोले कम्युनिष्ट एकताका लागि नै आफूले पार्टी घोषणा गरेको बताए ।
‘मैले आज पार्टीको जुन शिलान्यास गरेको छु, उद्घाटन गर्ने बेलामा नेपाल चकित हुनेछ । लाखौं व्यक्तिहरु यो पार्टीको वरपर गोलबन्दी हुनेछन्’ उनले भने ।
आफू हालसम्म गएका पार्टीहरु सुदृढ र राम्रो बनेको दाबी गरेका उनले उद्घाटनका बेला हजारौं मानिस आफ्नो साथमा हुने दावी समेत गरेका छन् ।
‘म जुन पार्टीमा जान्छु त्यो पार्टी त्यस्तै हुन्छ । विगतमा पनि त्यस्तै भएको थियो । म जहाँ जहाँ सामेल भएको छु, इमान्दारी र बलिदानी भावनासाथ निःस्वार्थ भावनाकासाथ काम गरेको छु’ उनले भने ।
