फरकधारका चलचित्र निर्देशन गर्न सफल निर्देशक दीपेन्द्र के खनालको निर्देशनमा फेरी अर्काे फिल्मको छायाँकन सम्पन्न भएको छ । फिल्म ‘के घर के डेरा’को छायांकन सम्पन्न भएको हो । छायाँकन सुरु भएको ३३ दिनमा यो चलचित्रको दुश्याँकनको काम सम्पन्न भएको हो । आज काठमाडौंको कला परिषद् परिसरमा यस फिल्मको अन्तिम दिनको छायांकन सम्पन्न भएको निर्देशक खनालले जानकारी दिए ।
उनका अनुसार यस फिल्ममा कलाकारको एकदमै राम्रो साथ भएकोले नतिजा पनि राम्रै देखिने उनले बिश्वास ब्यक्त गरेका छन् । यस फिल्ममा चर्चित अभिनेता दयाहाङ राई, विपिन कार्की, वर्षा राउत र सुरक्षा पन्तको मुख्य अभिनय रहेको छ । काठमाडौंमा घर नहुनेहरुको संघर्षपूर्ण जीवनशैलीलाई कलात्मक रुपमा यस फिल्मले प्रस्तुत गरेको निर्देशक खनालले जानकारी दिए ।
सामाजिक कथा बोकेको यस फिल्मको पटकथा महेश दवाडीले लेखेका हुन् । शरद श्रेष्ठ, राजीव श्रेष्ठ र किरण महर्जन निर्माता रहेको फिल्मको कार्यकारी निर्माता युवराज कार्की रहेका छन् ।यसै वर्षभित्र फिल्म रिलिजको तयारी गरिएको छ ।
