काठमाडौं। केहीदिनको अविरल वर्षापछिको भयानक बाढीले सिन्धुपाल्चोकको मेलम्ची क्षेत्रमा ठूलो धनजनको क्षती गराएको छ । इन्द्रवती नदीमा आएको बाढीका कारण मेलम्ची बजार चुर्लुम्मै डुबेको छ । बजारको बिच सडक र घरलाई ठपक्कै ढाक्दै नदी हिँडेपछि बजार बगरमा परिणत भएको छ । सिन्धुपाल्चोकका सहायक प्रजिअ बाबुराम खनालका अनुसार अझै बजारमा जाने अवस्था बनीसकेको छैन । नदीले धार परिवर्तन गरेर बजार पसेपछि बाढीले घर भत्काएका कारण स्थानीयहरुको चिहिनविहल मच्चिएको छ ।
स्थानीयहरुले आफ्नो धनसम्पत्ति खोलाको बगरमा परिणत भएपनि अब कसरी दैनिकी चलाउने भन्ने चिन्तामा उनीहरु डुबेका छन् ।
सभामुख अग्नि सापकोटा, स्वास्थ्यमन्त्री शेरबहादुर तामाङ लगायतपनि घटनास्थलको निरीक्षणमा पुग्दै उद्दार र राहतका कार्यलाई प्रभावकारी बनाउन निर्देशन दिएका छन् । त्यस्तै काँग्रेस सभापति शेरबहादुर देउवा, प्रचण्ड लगायतका शीर्ष नेताहरुले पनि राहात र उद्धारमा लाग्न आफ्ना नेता कार्यकर्ताहरुलाई निर्देशन दिएका छन् ।
यसैबिच सिन्धुपाल्चोकको हेलम्बुमा भिषण बाढी र पहिलो जाँदा बेपत्ता भएका ७ जनाको पहिचान खुलेको छ । जिल्ला प्रहरी कार्यालय सिन्धुपाल्चोकका अनुसार बेपत्ता हुनेमा हेलम्बु–२ का ३१ वर्षीय माधव भण्डारी, ४२ वर्षीय गणेश ज्योती, हेलम्बु–३ घर भएका १३ वर्षीया टिकामाया खड्का, हेलम्बु–७ का ज्ञानेन्द्र कक्षपति, हेलम्बु–६ का च्याङ्बा तामाङका श्रीमान दम्पती र साँगाचोकगढी घर भएका सुरेन्द्र नेपाल रहेका छन् । सिन्धुपाल्चोकका सहायक प्रजिअ बाबुराम खनालका अनुसार उक्त षेत्रमा राहात र उद्धारकार्य जारी राखिएको छ ।
यसैबिच मेलम्चीमा आएको भिषण बाढीका कारण समस्या परेर घरको छतमा पुगेका हेलिकप्टरबाट उद्धार गरिएको छ । नेपाली सेनाका अनुसार आज बिहान मेलम्ची बजारको रोज होटलको छतबाट उनीहरूलाई हेलिकप्टरमार्फत् उद्धार गरिएको हो । होटलमा बसेका उनीहरु बाढी आएपछि त्यहीँ फसेर होटलको छतमा बसेर ज्यान जोगाएका हुन् । बाढीले वरिपरिबाट होटललाई घेरेको थियो भने केही तला डुबाएपछि नेपाली सेनाको हेलिकप्टरबाट उनीहरुको उद्धार गरिउको सिन्धुपाल्चोकका प्रमुख जिल्ला अधिकारी अरूण पोखरेलले जानकारी दिए ।
सिन्धुपाल्चोकका प्रमुख जिल्ला अधिकारी अरूण पोखरेलका अनुसार उनीहरु होटलबाट बाहिर निस्कन नसकेपछि होटलकै छतमा गएका थिए। गएराती आएको भिषण बाढीका कारण ठूलो धनमालको क्षती भएसँगै अहिले उक्त क्षेत्रमा उद्धार र राहात कायृक्रमलाई अगाडी बढाइएको छ ।
