काठमाडौँ ।
काठमाडौँका मेयर बालेन शाह र धरान उपमहानगरपालिकाका मेयर हर्क साम्पाङ्गको चर्चा हुन थालेको करिब १ महिना भयो ।
चुनावअघि खासै चर्चामा नरहेका तर चुनावको पूर्वसन्ध्यामा एकाएक भा इरल बनेका यी दुई पात्रहरुले निर्वाचन जितेपछि पनि राम्रो काम गर्ने संकेत देखाएका छन् ।
काठमाडौँमा बालेनले चमत्कार गरिरहँदा धरान उपमहानगरपालिकाका मेयर हर्क साम्पाङ्गले धरानमा कमाल गरिरहेका छन् । यसैबिच उनले पानीको मुहान खानेपानीको जलाधार क्षेत्रमा सुरक्षामा खटिएका नगरप्रहरीलाई भेट्न जाँदा खाजा र पानी बोकेर पुगेको एउटा तस्विर अहिले भाइरल बनिरहेको छ ।
पहरामा रहेका नगरप्रहरीको लागि खाजा र पानी बोकेर पुगेका मेयर साम्पाङ्गले त्यहाँ नगरप्रहरीले भोगिरहेका समस्या बारेमा सोधपुछ समेत गरेको बताइएको छ ।
साम्पाङ्गले नगरप्रहरीलाई खानेपानीको मुहानमा दिशापिसाव गर्न अटेर गर्नेहरु भए नभएको बुझ्दै यदि कोही कसैले अटेर गरे गाडीको नम्बर नोट गर्न नगरप्रहरीलाई निर्देशन दिएका थिए । उनले अरु नगरप्रहरीको आवश्यकता रहे नरहेको समेत बुझेर मानवता देखाएका छन् ।
उनले धरानमा स्वतन्त्र रुपमा बाजी मारेसँगै तत्कालै खानेपानीको मुहान क्षेत्रमा सरसफाई गरी पानीको मुहानको सुरक्षाको लागि नगरप्रहरीको परिचालन गरिएको थियो ।
उनले खानेपानीको मुहान क्षेत्रमा नुहाउने , दिशापिसाव गर्ने कार्य बन्द गर्न एक सिफ्टमा ३ जनाको दरले नगरप्रहरी परिचालन गरेसँगै पानीको मुहानमा दिशापिसाव गर्ने र फोहोर फाल्न रोकिएको छ ।
