काठमाडौं ३० जेठ । नेपाली कांग्रेसकी सांसद पार्वता डीसी चौधरीले कांग्रेसको आलोचना भइरहेको प्रति आपत्ती जनाएकी छन् । कृषि तथा पशुपन्छी विकासमन्त्री महिन्द्रराय यादवका कारण सरकार र कांग्रेसको आलोचना भएको भन्दै सांसद चौधरीले आपत्ती जनाएकी हुन् ।
संसदमा नेकपा एमालेले दर्ता गरेको रासायनिक मल अभावसम्बन्धी अत्यन्त जरुरी सार्वजनिक महत्वको प्रस्तावमाथि छलफलमा भाग लिंदै सांसद चौधरीले राम्रो व्यक्तिलाई मन्त्री नबनाउँदा सरकार र कांग्रेसकै बेइज्जत भएको बताएकी हुन् ।
रोष्टमबाटै कृषि मन्त्रीतर्फ आक्रोशित हुँदै सांसद चौधरीले भनिन्, ‘हिजो हाम्रो सभापतिले चाहेर पनि एक्लै काम गर्न नसकेको बताउनु भयो । यो सबै तपाईंहरु जस्ता मन्त्रीले गर्दा हाम्रा प्रधानमन्त्री र हाम्रो सभापतिले काम गर्न सक्नु भएन ।
नेतृत्व आफ्नो पार्टीको भएकाले बेइजत त कांग्रसको हुन्छ भन्दै उनले सरकारले राम्रो मन्त्री नबनाउँदाको परिणाम देखिएको बताएकी छन् ।
