काठमाडौं १६ जेठ । आइतबार बिहान पोखराबाट जोमसोमका लागि उडेको तारा एयरको विमान दुर्घटनामा परेका सबै यात्रुको शव फेला परेको छ ।
मुस्ताङको थसाङ गाउँपालिका२ को सानोस्वारे भीरमा तारा एयरको यात्रुवाहक जहाजमा सवार सबैको शव भेटिएको हो । फेला परेको शव मध्ये १० वटा बेनी–जोमसोम सडक खण्डअन्तर्गत कोवाङमा लगिएको छ ।
बाँकी शव ल्याउने क्रममा जारी रहेको र उद्धार कार्य पनि भइरहेको बताइएको छ । फेला परेका शवहरुको पहिचान भने भएको छैन ।कोवाङ झारिएका शवको मुचुल्का उठाउन सुरु गरिएको छ ।
शव उद्धारकर्ताले भीरमा बोकेर झार्नुपर्ने भएकोले एकै खेपमा उद्धार सम्भव नभएको बताइएको छ । शवको मुचुल्का तयार पारी शव काठमाडौं लैजाने तयारी समेत भएको बताइएको छ ।
आइतबार बिहान पोखराबाट जोमसोमका लागि उडेको तारा एयरको विमान दुर्घटना हुँदा १९ यात्रु र तीन चालक दलका गरी २२ जनाको मृत्यु भएको छ ।
