काठमाडौं २६ वैशाख । राष्ट्रिय प्रजातन्त्र पार्टी राप्रपाका अध्यक्ष राजेन्द्र लिङदेनले इमान र नैतिक हराएका मान्छेलाई मेरो पार्टी हो भनेर भोट नहाल्न मतदातालाई आग्रह गरेका छन् ।
सोमवार चाँगुनारायणमा आयोजना गरेको चुनावी सभालाई सम्बोधन गर्दै अध्यक्ष लिङदेनले यस्तो आग्रह गरेका हुन् ।
आफ्नो गाउँको विकास गर्नसक्ने नेता र दललाई रोजेर भोट हाल्न आग्रह गरेका उनले जनताको साथमा हुने नेतालाई मात्रै भोट दिन भनेका छन् ।
‘हामीलाई एकचोटी भोट दिनुस्, अर्कोचोटी तपाईंलाई दिन्छौं भनेर भोट लिएर सांसद, मन्त्री हुने र जनतालाई धोका दिएर केही नगर्ने इमान नभएका व्यक्ति हुन्, त्यस्तालाई भोट नदिनुस्’ उनले भने ।
अब राप्रपा एक मात्रै वैकल्पिक शक्ति पार्टी भएकाले एक पटक राप्रपालाई हेर्न आग्रह गरेका उनले राप्रपाले कसरी विकास गर्छ भनेर नमूना हेर्न नेपालगञ्ज उपमहानगरपालिका नै काफी भएको बताएका छन् ।
‘अर्कै पार्टीको परियो भनेर धक नमान्नुस्, आफ्नै पार्टीको झण्डा समाउनुस् तर भोट एक पटक हामीलाई दिनुस् ।’उनले थप सम्बोधनमा भने ।
