काठमाडौ २१ वैशाख । यही वैशाख ३० गते हुने स्थानीय तह निर्वाचनको लागि नेपाली कांग्रेसले आज बुधबारबाट साताव्यापी चुनावी सभा गर्ने भएको छ ।
चुनावी सभाको आज पहिलो दिन पार्टीका सभापति समेत रहेका प्रधानमन्त्री शेरबहादुर देउवाले सम्बोधन गर्ने भएका छन् । उक्त सभालाई सम्बोधन गर्न प्रधानमन्त्री देउवा आज विराटनगर जाँदैछन् ।
त्यसैगरी, वरिष्ठ नेता रामचन्द्र पौडेल, महामन्त्री विश्वप्रकाश शर्मालगायत नेताहरु ले पनि आज सभालाई सम्बोधन गर्ने भएका छन् । निर्वाचनको लागि कांग्रेसले देशका १० स्थानमा चुनावी सभा गर्ने भएको हो ।
भोली वैशाख २२ गते चितवनको भरतपुरमा पनि सभापति शेरबहादुर देउवा , वरिष्ठ नेता रामचन्द्र पौडेल लगायतले चुनावी सभालाई सम्बोधन गर्ने भएका छन् ।
त्यसैगरी, वैशाख २३ गते काठमाडौंमा, वैशाख २४ गते रुपन्देहीको बुटवलमा, वैशाख २४ गते नै फेरि दमौली र धनुषाको जनकपुरमा, वैशाख २५ गते कास्कीको पोखरा र दाङको तुलसीपुरमा चुनावी सभा आयोजना हुने भएको छ ।
साथै, वैशाख २६ गते कैलालको धनगढीमा र २७ गते डडेलधुरामा चुनावी सभा आयोजना हुने भएको छ ।
