काठमाडौ १२ वैशाख । अखिल(क्रान्तिकारी)का महासचिव दिपेश पुनले काठमाडौं महानगरका जनताले एमालेलाई अब फेरि मतदान नगर्ने दावी गरेका छन् । काठमाडौंका मेयर बिध्यासुन्दर शाक्यको कार्यकालमा भोगेका काठमाडौं बासीहरुले फेरि एमालेलाई भोट नदिने पुनले दावी गरेका हुन् ।
अखिल क्रान्तिकारी कान्तिपुर कलेज अफ इन्जिनियरिङद्वारा आयोजीत अन्तरकलेज बास्केटबल प्रतियोगिता समापन कार्यक्रमलाई सम्बोधन गर्दै उनले यस्तो बताएका हुन् ।
बिध्यासुन्दर सँगै मेयर भएका काँग्रेसका चिरिबाबुले ललितपुरको बिकाश र बिशेषगरि सम्पदा संरक्षणमा निकै राम्रा काम गरेको प्रशंसा गरेका उनले भने , ‘भक्तपुरलाई मजदुर किसान पार्टीले बसौं बसौं लाग्ने बनाए । तपाईले देख्नु भएकै छ भरतपुरकी मेयर रेणु दहालले भरतपुरलाई देशकै नमुना नगरको रुपमा बिकाश गरिन् । तर बिध्यासुन्दर चुनाव जिते लगत्तैबाट फरार छन ।’
बिध्यासुन्दर जस्ता खराब प्रतिनिधिको दिन सकिएको भन्दै उनले काठमाडौंका जनताले अब एमालेलाई हराएर सबक सिकाउनु पर्ने बताएका छन् ।
‘जुनतारा झार्ने भाषण गरेर मेयर जितेका बिध्यासुन्दरले सिन्को समेत नभाँचेर पाँच बर्ष बिताए ।’ उनले भने ।
