नयाँ बर्ष लागे संगै नेपाली सिनेजगतका अभिनेत्रीहरुको धमाधम लगनगाँठो कसिन थालेको छ । कसैलाई छनक नै नदिई अभिनेत्री केकी अधिकारीले केही दिन अघि बिबाह गरिन् । अब अहिले अभिनेत्री बर्षा शिवाकोटी पनि बैबाहिक बन्धनमा बाँधिएकी छिन् । शुक्रबार काठमाडौंको नागार्जुन रानीवनस्थित रेसु भिल्लामा अभिनेत्री वर्षाले बिबाह गरेकी हुन् ।
उनले अमेरिकामा बसोबास गर्दै आएका आफ्नो प्रेमी आशिष गेलालसँग विवाह गरेकी हुन् । उनीहरु दुबै जना केही समयदेखि प्रेम सम्बन्धमा रहेका थिए । आफ्नो प्रेमीलाई भेट्न बर्षा अमेरिका जाने आउने क्रम चलिरहेको थियो । उनका प्रेमी आशिष पेशाले इन्जिनियर रहेका छन् । बर्षाको विवाह समारोहमा परिवारका सदस्य, आफन्त र साथीहरुको उपस्थिति रहेको थियो ।
उनको विवाहलाई निकै गोप्य राख्ने प्रयास गरिएको पनि त्यसो हुन सकेन । ‘नाइँ नभन्नु ल २’बाट नेपाली सिनेजगतमा डेब्यु मारेकी अभिनेत्री बर्षाले करियरमा केही हिट फिल्महरु समेत दिएकी छिन् । अभिनेत्री वर्षाले ‘पशुपतिप्रसाद’, ‘वीर विक्रम २’, ‘लप्पनछप्पन २’, ‘पुरानो बुलेट’लगायतमा काम गरेकी छन् ।
