अहिले दक्षिण भारतीय चलचित्रको बिगबिगी भइरहेको बेला नेपाली फिल्मलाई प्रतिष्पर्धा गर्न निक्कै गाह्रो भईरहेको छ । साउथ फिल्मको अगाडी बलिउड अर्थात हिन्दी फिल्म पनि फिक्का देखिईरहेको बेला नेपाली चलचित्र झन् सुधारिएर आउनु पर्ने अवस्थामा पुगेको छ । त्यसैले अहिले नेपाली फिल्महरु पनि एक्सनप्रद बन्न थालेका छन् । यसैमध्ये एक फिल्म हो शमशेर ।
एभरेष्ट फिल्म एकेडेमी र डी आर डेनिमको ब्यानरको लगानीमा यो फिल्म बन्न लागिरहेको हो । एक्सन फिल्म भएकोले कलाकार छनौट पनि सोहि अनुसार गरिदै आएको छ । निर्देशक फाइनल नभएता पनि फिल्म ‘शमशेर’ युनिटले अन्य कलाकारहरूलाई अनुबन्धित गर्ने क्रम भने जारी नै राखेको छ । केही दिन यता फिल्म निर्माण गर्ने पक्षले कलाकारहरूको लाइनअप गरिरहेको छ ।
पछिल्लो पटक यस चलचित्रमा अभिनेता प्रकाश शाह र एभरेष्ट फिल्म एकेडेमीका विद्यार्थी सुमन थापा अनुबन्धित भएका छन् । अभिनेता मनिष राउत र गौरव पहारी पश्चात टिमले अन्य कलाकारहरू पनि लाइनअप गरिरहेको हो । यो फिल्ममा कमेडि च्याम्पियनका च्याम्पियन हिमेश पन्त, सुमन गौतम, सबिन शाक्य, रुपेश कार्की, रुपेश लामा, आशिस पराजुली लगायतका कलाकारको पनि अभिनय रहनेछ ।यो फिल्मको छायाँकन नेपालको काठमाडौँ, , सोलुखुम्बु , ढोरपाटनमा गरिनेछ भने केही दृश्य दुबईमा छायांकन गरिने बताइएको छ । फिल्ममा अर्जुन पोखरेलको संगीत रहने छ ।
