अन्ततः लामो समयको पर्खाई पछि मन पराइएका स्टारकिड अनमोल केसी र सुहाना थापाको अभिनय रहेको चलचित्र ‘ए मेरो हजुर ४’ दर्शकले हेर्न पाउने भएका छन् । नयाँ बर्षको अवसर पारेर भोली बिहीबारबाट चलचित्र प्रदर्शनमा आउँदैछ। रिलिजको पुर्व सन्ध्यामा बुधबार साँझ निर्माण टिमले फिल्मको प्रिमियर शो को आयोजना सम्पन्न गरेको छ ।
काठमाडौंको बिग मुभिजमा आयोजित प्रिमियरमा नेपाली कला क्षेत्रमा आवद्ध थुप्रै कलाकर्मीको बाक्लो उपस्थिति रहेको थियो । प्रेम कथामा आधारित फिल्मको प्रिमियरमा कलाकार, निर्माता, निर्देशक, र पत्रकार अनि अन्य समाजिक संस्थामा आवद्ध व्यक्तित्वहरुको उपस्थिती रहेको थियो। प्रिमियर शो मा अनमोलले आफ्नो कुकुर समेत लिएर पुगेका थिए ।
यस फिल्ममा कुकुर प्रयोग गरिएको छ त्यो कलाकार अनमोलको आफ्नै कुकुर हो। उनको कुकुरको नाम कोको मोनस्टर रहेको छ । जो सँग अनमोल निकै नजिक रहेका छन्। यस चलचित्रमा अभिनेता सलोन बस्नेत, रेयर राई, निर्मल शर्मा लगायत कलाकारहरुको अभिनय रहेको छ । चलचित्रलाई झरना थापाले निर्देशन गरेकी हुन् भने सुनिलकुमार थापाले निमार्ण गरेका हुन् ।
