कोरोना संक्रमण हटे संगै पछिल्लो समय सिने जगत चलायमान बन्न थालेको छ । फिल्म रिलिज हुने, छायाँकन हुने र नयाँ फिल्मको घोषणा जस्ता गतिबिधि सुरु भएका छन् । यसैक्रममा साइकोलोजिकल थ्रिलर प्याट्रनमा रहेको नेपाली फिल्म ‘षट्कोण’ को ट्रेलर सार्वजनिक गरिएको छ । यस फिल्मलाई मिलन डि काप्रिले निर्देशन गरेका हुन् ।
यस फिल्मको सार्वजनिक ट्रेलरमा अभिनेता कर्मा एक मर्डरको रहस्यको खोजीमा लागेको पत्रकारको भुमीकामा देखिएका छन् । २ मिनेटको ट्रेलरमा भोलाराज सापकोटा, लोकेन्द्र लेखक, सुयशा अधिकारी, विराज कडरिया, शिशिर लिम्बु वानेम, बाल कलाकार असिम लामाको अभिनय रहेको छ । क्लेमेन्टाइन प्रोडक्सन र ट्राभलर्स क्रिउ फिल्मस्को ब्यानरमा निर्माण भएको फिल्म आगामी वैशाख २३ गतेबाट नेपालका सिनेमा घरमा रिलिज हुने निर्माण पक्षले जनाएको छ ।
‘षट्कोण’ मिलनको डेब्यु निर्देशकीय फिल्म समेत रहेको छ । शिशिर लिम्बु वानेमको कथा तथा पटकथा रहेको फिल्मको संवाद महेश दवाडीले लेखेका हुन् । यसमा आङ्छेन लामाको छायांकन, सागर खनाल र निर्देशक मिलन डि काप्रि आफैले सम्पादन गरेका छन् ।
