काठमाडौँ, २२ चैत – उपराष्ट्रपति नन्दबहादुर पुनले मुलुकमा बढ्दै गएको व्यापार घाटा कम गर्न स्वदेशमै उत्पादन बढाउने किसिमको व्यवसायमा लाग्न उद्योगी व्यवसायीलाई आग्रह गर्नुभएको छ । नेपाल राष्ट्रिय व्यवसायी महासङ्घको चौथो साधारणसभा तथा दोस्रो राष्ट्रिय महाधिवेशनको आज उद्घाटन गर्दै उहाँले मुलुकमा बढ्दै गएको व्यापार घाटा कम गर्दै समृद्ध मुलुक निर्माणका लागि स्वदेशमै उत्पादनमूलक व्यवसाय बढाउनुपर्ने बताउनुभयो ।

“विदेशी मुलुकबाट आयात गरी व्यवसाय गर्नेतर्फ नभई स्वदेशमै उत्पादन बढाउने किसिमको व्यवसाय गर्नुपर्छ, जसले देशको विकासमा टेवा पु¥याउँछ”, उहाँले भन्नुभयो । निर्यात कम हुने र आयात धेरै हुँदा अर्थतन्त्रलाई नकारात्मक असर परेको उहाँको भनाइ थियो ।संविधानको मर्म र भावनाअनुसार सिंहदरबारको अधिकार गाउँगाउँमा पुगे पनि नेपाली जनताको आर्थिक विकासमा अपेक्षाकृत परिवर्तन र पर्याप्त रोजगारीको अवसर बन्न नसकेको उहाँले बताउनुभयो । विसं २०६२÷६३ मा भएको राजनीतिक परिवर्तनसँगै सकारात्मक दिशामा अगाडि बढेको देशको अर्थतन्त्र कोरोनाको कारण पुनः चपेटामा परेको उहाँको भनाइ थियो ।

उपराष्ट्रपति पुनले नेपाली पुँजीपतिलाई ढुक्क भएर नेपालमा लगानी गर्नसमेत आग्रह गर्नुभयो । “म नेपाली पुँजीपतिहरुसँग आग्रह गर्न चाहन्छु, पुँजी विदेशमा लैजाने नसोच्नुस्, उल्टो विदेशी पुँजीसमेत नेपालमा भित्र्याउनुहोस्”, उहाँले भन्नुभयो ।आत्मनिर्भर अर्थतन्त्र बनाउनका लागि सरकार निजी क्षेत्रसँग मिलेर अघि बढ्नुपर्ने उहाँको भनाइ थियो । उपराष्ट्रपति पुनले साना तथा मझौला उद्योगी व्यवसायीको समस्या समाधान गर्न सरकारको ध्यानाकर्षणसमेत गर्नुभएको छ ।

काठमाडौँ महानगरपालिकाका प्रमुख विद्यासुन्दर शाक्यले मुलुकको आर्थिक विकासका लागि उद्योगी व्यवसायीको महत्वपूर्ण भूमिका रहेको बताउनुभयो । “तपाईँहरु ढुक्क भएर लगानी गर्नुहोस्, तपाईँको लगानीको ग्यारेन्टी तीन तहकै सरकारले गर्नेछ”, उहाँले भन्नुभयो ।नेपाल राष्ट्रिय व्यवसायी महासङ्घका अध्यक्ष नरेश कटुवालले मुलुकको विकासका लागि सरकारले निजी क्षेत्रलाई समन्वय गरेर अगाडि बढ्नुपर्ने बताउनुभयो । उहाँले व्यवसायीका समस्या समाधानका लागि सरकारले पहल गर्नुपर्ने उल्लेख गर्नुभयो ।

नेपाल चेम्बर अफ कमर्शका उपाध्यक्ष सुरेन्द्रकुमार श्रेष्ठले कोरोनाका कारण साना तथा मझौला उद्योगी मारमा परेको भन्दै यस्ता व्यवसायीलाई राज्यले उचित सम्बोधन गर्नुपर्ने बताउनुभयो । उहाँले मुलुकको अर्थतन्त्र सकारात्मक गतिमा हिँड्न नसकेको भन्दै यसलाई सकारात्मक गतीमा हिँडाउनका लागि सरकारले अभिभावकको भूमिका निर्वाह गर्नुपर्ने स्पष्ट पार्नुभयो ।

नेपाल राष्ट्रिय व्यवसायी महासङ्घका वरिष्ठ उपाध्यक्ष कुमार कार्कीले कोरोना महामारीको विषम् परिस्थितिका बाबजुद महासङ्घमा आबद्ध सम्पूर्ण उद्योगी व्यवसायीको हकहित र अधिकारका लागि निरन्तर सङ्घर्ष गर्दै आएको बताउनुभयो ।विसं २०७३ मा स्थापना भएको महासङ्घमा हाल देशभरका २२ व्यवसायी सदस्यको आबद्धता छ । महासङ्घमा १० हजारभन्दा बढी व्यवसायी आबद्ध रहेको अध्यक्ष कटुवालले जानकारी दिनुभयो ।