मैत्रीपूर्ण खेलका लागि नेपाली राष्ट्रिय फुटबल टिम थाइल्याण्ड जाने भएको छ । अखिल नेपाल फुटबल संघ एन्फाले आइतबार नेपाली टोलीलाई बिदाइ गरेको हो । नेपाली टोली सोमबार थाइल्याण्ड प्रस्थान गर्नेछ । यसैक्रममा नेपाली राष्ट्रिय फुटबल टिमका मुख्य प्रशिक्षक अब्दुल्लाह अल्मुताईरीले थाइल्याण्ड विरुद्धको मैत्रीपूर्ण खेल नेपालका लागि महत्वपूर्ण हुने प्रतिक्रिया दिएका छन् ।
बिदाइ कार्यक्रममा बोल्दै प्रशिक्षक अल्मुताईरीले यो मैत्रीपूर्ण खेल फिफा वरीयता सुधारका लागि हुने बताए । साथै उनले एएफसी एसियन कप छनोटका लागि महत्वपूर्ण हुने पनि बताएका छन् । बिदाई कार्यक्रममा बोल्दै उनले भने -थाइल्याण्ड राष्ट्रिय टिमविरुद्धको पहिलो खेल महत्वपूर्ण हुनेछ किनकि थाइल्याण्ड त्यही क्षेत्रको हो जहाँ इन्डोनेसिया पर्छ र उनीहरु जोर्डन र कुवेतको वरीयतामा रहेका छन् र यो हाम्रो लागि राम्रो हो ।
एएफसी एसियन कप छनोट अन्तर्गत तेस्रो चरणको खेल अघि नेपालले थाइल्याण्डसँग खेल्न लागेको हो । नेपालले थाइल्याण्डसँग बिहीबार खेल्नेछ । छनोटमा नेपाल समूह ए मा रहेको छ । नेपाल रहेको समूहमा कुवेत, इन्डोनेसिया र जोर्डन रहेका छन् ।
