काठमाडौं ६ चैत । माओवादी केन्द्रका अध्यक्ष पुष्पकमल दाहाल प्रचण्डले अबको निर्वाचनमा आफ्नो पार्टी पहिलो बन्ने दावी गरेका छन् । आइतबार पोखरामा प्रेस सेन्टरले आयोजना गरेको पत्रकार सम्मेलनमा सहभागी भएका प्रचण्डले चुनावमा तालमेल गर्न नजाने भन्दै यस्तो गरेका हुन् ।
माओवादीसँग अरु पार्टी नै तालमेल गर्न खोजेको बताएका उनले पछिल्लो समय माओवादी प्रवेश गर्नेहरुको लहर सुरु भएकाले आफ्नो पार्टी चुनावमा मा पहिलो बन्ने दावी गरेका छन् ।
‘देशभरिको सबै स्थिति हेर्दा हामी पहिलो पार्टी बन्ने सम्भावनातिर अघि बढिसक्यौँ, अबको चुनाव कसैको वैशाखी टेकेर होइन, आफ्नै बलमा हामी चुनाव लड्ने तयारी गर्दै छौँ,एकचोटि फेरि माओवादी आउनैपर्छ ।’उनले भने ।
जनतालाई पनि माओवादीले नै उत्पीडित वर्ग,जाति र समुदायको अधिकार दिलाएको बताएका उनले पछिल्लो समय सबैतिर संविधान बचाउने र शान्ति प्रक्रिया पुरा गर्ने माओवादी नै हो भन्ने परेको स्पष्ट पारेका छन् ।
आफ्नो पार्टी देशको परिवर्तनको वाहक भएकाले अरू सबै पार्टी माओवादीसँग तालमेल गर्न आउनुपर्छ भन्दै उनले आफुहरु तालमेल गर्न नजाने बताएका छन् ।
