काठमाडौं २१ माघ । कारोवारको रकम एकलौटी हुने लोभमा परी साझेदार तिन जनाको हत्या गर्ने तिन जनालाई प्रहरीले आज सार्वजनिक गरेको छ ।
शुक्रबार प्रहरीले पत्रकार सम्मेलन गरी अभियुक्त सिरहा नगरपालिका–२१ स्थायी घर भई काठमाडौंको बल्खु बस्ने ३१ वर्षीय अनिल मण्डल, मोरङको धनपालथान गाउँपालिका–७ कमलपुरका ६२ वर्षीय नासिर आलम र मोरङको जहदा गाउँपालिका–४ सिस्वनी घर भएका अमित साह भनिने दिनानाथ सोनारलाई सार्वजनिक गरेको हो ।
कारोवार साझेदार राजेन्द्र कुमार श्रेष्ठ र शम्भु कुमार चौधरीको हत्या गरी उनीहरुको शव मोरङको धनपालथानस्थित उखुबारीमा खाल्डो खनेर गाडिएको अवस्थामा फेला परेको थियो ।
अर्का साझेदार मोहन लिम्बुको हत्या गरी उनको शव ललितपुर महानगरपालिका–१२ ठेंचोस्थित एक गोदाम घर रहेको कम्पाउण्डमा गाडिएको अवस्थामा बिहिबार फेला परेको हो ।
