काठमाडौं २० माघ । डा सिके राउत नेतृत्वको जनमत पार्टीले आज बिहानै देखि आन्दोलन सुरु गरेको छ ।
किसानहरुको हक अधिकारलाई लिएर जनमत पार्टीका कार्यकर्ताहरुले आज बिहानै देखि मधेशमा पूर्वपश्चिम राजमार्ग अवरूद्ध गरेका छन् ।
प्रदर्शनका कारण सिरहा, सप्तरी र धनुषालगायत जिल्लाका राजमार्ग क्षेत्रमा प्रभाव परेको छ । जनमत पार्टीका कार्यकर्ताले बाटोमा फाटा बोकी टायर बालेर प्रदर्शन गरिरहेका छन् ।
किसानको मागलाई लिएर विगत एक महिना देखि ११ बुँदे माग अघि सारेर सुरु भएको जनमत पार्टीको आन्दोलनमा सरकारले कुनै चासो नदिएको भन्दै अनिश्चितकालका लागि चक्काजाम घोषणा गरेो छ ।
किसानलाई मलखाद दिनुपर्ने, सिँचाइको व्यवस्था गर्नुपर्ने, किसानलाई पेन्सन दिनुपर्ने लगायतमा माग राख्दै जनमत पार्टीले आन्दोलन गर्दै आएको छ ।
जनमत पार्टीका उपाध्यक्ष दिपक कुमार साहले बताए अनुसार आजदेखि पूर्ण रुपमा सडक बन्दको घोषणा गरिएको छ ।
