काठमाडौ ६ माघ । यही माघ १२ गते हुन लागेको राष्ट्रिय सभाको निर्वाचनको लागि निर्वाचन आयोगले २१ बुँदे स्वास्थ्य सुरक्षा मापदण्ड अनिवार्य गरेको छ । कोरोना संक्रमणको यो जटिल अवस्था हुन गइरहेको निवार्चनको लागि आयोगले स्वास्थ्य सुरक्षा मापदण्डलाई अनिवार्य गरेको हो ।
आयोगले आज बिहिबार एक विज्ञप्ती जारी गर्दै मतदान तथा मतगणना कार्यमा संलग्न हुने सबै मतदाता, मतदान कर्मचारी, उम्मेदवार, दलका प्रतिनिधि, सुरक्षाकर्मी तथा स्वयंसेवक लगायतसरोकारवालाले मापदण्डको पालना गर्नुपर्ने जानकारी गराएको छ ।
मतदान स्थल तथा मतदान केन्द्रमा प्रवेश गर्न अनुमति पाएका सबै व्यक्तिले पूर्ण खोप लगाएको प्रमाण देखाउनुपर्ने आयोगले जारी गरेको विज्ञप्तीमा उल्लेख गरिएको छ । साथै अनिवार्य रुपमा मास्क पनि लगाउनुपर्नेछ ।
मतदान स्थल तथा मतदान केन्द्रमा प्रवेश गर्नुअघि अनिवार्य रूपमा साबुन पानीले हात धुने र स्यानिटाइजर प्रयोग गर्ने व्यवस्था समेत गर्न समेतअ आयोगले निर्देशन दिएको छ ।
भौतिक दूरी कायम गर्न, अनावश्यक भिडभाड हुन नदिन, मतदान स्थलमा अनिवार्य रूपमा आवश्यक उपकरण सहितको एक एम्बुलेन्सको व्यवस्था गर्न जारी २१ बुँदै स्वास्थ्य सुरक्षा मापदण्डमा उल्लेख गरिएको छ ।
कोरोना संक्रमति मतदातालाई मत खसाल्न छुट्टै मतदान पेटीकाको पनि व्यवस्था गरिने जनाएको छ ।
