मनाङ मर्स्याङ्दी क्लबलाई हराउँदै साविक विजेता मछिन्द्र फुटबल क्लब सहिद स्मारक ‘ए’ डिभिजन लिग फुटबलको शीर्ष स्थानमा उक्लन सफल भएको छ । आज भएको खेलमा मनाङ मर्स्याङ्दी क्लबलाई शून्यका बिरुद्ध एक गोलले पाखा लगाउँदै मछिन्द्र अंक तालिकाको शीर्ष स्थानमा उक्लिएको हो ।
दशरथ रंगशालामा भएको एकदमै रोमान्चक र प्रतिष्पर्धात्मक खेलमा मछिन्द्रलाई जित दिलाउन सुनिल बलले गरेको गोल नै निर्णायक गोल बन्यो । सुनिलले खेलको इन्जुरी समयमा फ्रिकिकबाट उत्कृष्ट गोल गर्दै मछिन्द्रलाई बिजयी बनाए ।
मछिन्द्रले महत्वपूर्ण ३ अंक बटुलेको छ । आजको यो जितसँगै मछिन्द्रले ६ खेलमा १४ अंक जोडेको छ । मछिन्द्र मनाङ भन्दा एक अंकले अघि रहेको छ । दोस्रो स्थानमा झरेको मनाङले ५ खेलमा १३ अंक जोडेको छ ।
