काठमाडौं १४ मंसिर । कर्णाली प्रदेशका मुख्यमन्त्री जीवनबहादुर शाहीले आज विश्वासको मत लिने भएका छन् । मुख्यमन्त्री शाहीले आज दिउँसो १ बजे प्रदेशसभाको बैठकमा प्रमुख प्रतिपक्ष दल नेकपा एमाले सहभागी विना नै विश्वासको मत लिने भएका हुन् ।
नेपाली कांग्रेस संसदीय दलका नेता शाही कात्तिक १६ गते मुख्यमन्त्रीमा नियुत्त भएका थिए । मुख्यमन्त्री नियुक्त भएको ३० दिनभित्र विश्वासको मत लिनुपर्ने संवैधानिक व्यवस्थानुसार शाहीले आज विश्वासको मत लिने भएका हुन् ।
एमाले भने पार्टीको १० औं राष्ट्रिय महाधिवेशनको लागि चितवनमा हुँदा बैठकमा सहभागी नहुने एमाले संसदीय दलका नेता यामलाल कँडेलले जानकारी दिएका छन् । शाहीललाई पाँच दलको समर्थन रहेको छ ।
मुख्यमन्त्रीले विश्वासको मत नलिँदा संवैधानिक जटिलता आउने भएकाले बैठक नरोकिने कर्णाली प्रदेशका सभामुख राजबहादुर शाहीले बताएका छन् ।
