हङकङ, २५ कात्तिक- हङकङको एउटा अपार्टमेन्ट एसियाकै मंहगो साबित भएको छ । माउन्ट निकोल्सस्थित अर्पाटमेन्टलार्ई ६४ करोड हङकङ डलरमा बिक्री गरिएको छ । यस हिसाबले अर्पाटमेन्टको प्रति वर्ग फिट मूल्य १ लाख ४० हजार ८०० हङकङ डलर पर्छ । सहरकै महंगामध्येका दुई कम्पनी वार्फ होल्डिङ्स लिमिटेड र नान फङ डेभलपमेन्ट लिमिटेडले सो अपार्टमेन्ट बिक्री गरेका हुन् ।
पहाडको चुचुरोमा रहेको सो अपार्टमेन्ट हङकङ टापुको सुविधा सम्पन्न र बिलासी क्षेत्रमा छ । अर्पाटमेन्टका तीन ओटा पार्किङ क्षेत्र छन् । अर्पाटमेन्ट चार हजार ५४४ वर्ग फिटमा फैलिएको छ ।
यो अर्पाटमेन्टले नौ महिनाअघि बिक्री भएको अर्को अर्पाटमेन्टको रेकर्ड तोडेको छ । फेब्रुवरीमा हङकङका धनाढ्य भिक्टर लिको कम्पनी सीके असेट होल्डिङले प्रति वर्ग फिट १ लाख ३६ हजार हङकङ डलरमा एउटा अपार्टमेन्ट बिक्री गरेको थियो ।
पछिल्लो खरिद बिक्रीले हङकङ सहरको सुबिधा सम्पन्न आवासीय बजारको मूल्य निरन्तर बढिरहेको देखाएको छ ।
घर जग्गा तथा भवनमा भइरहेको लगानीबारे अनुसन्धान गर्दै आएको कोलिर्स इन्टरनेसनलका अनुसार पछिल्लो एक वर्षमा हङकङमा अर्पाटमेन्ट तथा भवन खरिद बिक्रीमा १२ अर्ब ८ करोड डलर बराबरको कारोबार भएको छ ।
यो कारोबार अघिल्लो बर्षको तुलनामा दोब्बर हो । त्यस्तै, आगामी वर्षको दोस्रो तीन महिनामा घर तथा अर्पाटमेन्टको मूल्यमा ३ प्रतिशतले बृद्धि हुने कोलिर्स इन्टरनेसनले अनुमान गरेको छ । पछिल्लो समय मुख्य भूमि चीन र र हङकङबासीको रोजाई महंगा घर र अर्पाटमेन्टमा परेको छ ।
