काठमाडौं १७ कात्तिक । नेपाली कांग्रेसका केन्द्रिय सदस्य नेता गगन थापाले अबको चुनावमा कसैसँग पनि गठवन्धन नगर्ने स्पष्ट पारेका छन् । बुधबार भक्तपुरमा आयोजित एक कार्यक्रममा सहभागी भएका नेता थापाले कांग्रेसको कसैसँग मिलेर चुनाव लड्ने ‘क्यारेक्टर’ नै नभएको दाबी गर्दै यस्तो बताएका हुन् ।
कांग्रेस आफैले शानदार ढंगले चुनाव लडेर बहुमत ल्याउँदै चुनाव जित्ने दावी गरेका थापाले अघि भने, ‘मंसिरमा महाधिवेशन सकिन्छ, पुसदेखि झोला बोकेर चुनावमा होमिने हो । अधिवेशनको नाउँमा पार्टीभित्र तिक्तता नबढाऔँ । महाधिवेशन लगत्तै चुनावमा जानुपर्ने छ । त्यसलाई ध्यानमा राखेर महाधिवेशन होमिनुस् । अब तोकिएकै मितिमा महाधिवेशन हुन्छ ।’
अब कांग्रेसले एकलौटी पाँच वर्ष सरकार चलाउने दावीका साथ उनले कांग्रेसले यत्रो समयदेखि थुप्रिएर रहेका समस्याहरुको समाधान गर्नुपर्ने समेत बताएका छन् ।
